Y dystiolaeth: niweidio’ch iechyd

Cynnau tanau yn ein cartrefi yw un o'r ffynonellau mwyaf o lygredd aer gronynnau mân niweidiol yn y DU. ¹

Mwya’n byd o lygredd aer gronynnau mân niweidiol rydych chi'n dod i gysylltiad ag e, y mwyaf tebygol ydych chi o farw o glefyd y galon, clefyd yr ysgyfaint neu ganser yr ysgyfaint² Hefyd, mae'n gallu cynyddu'n sylweddol eich risg o ddatblygu diabetes,³ niweidio iechyd eich ymennydd ac arwain at ddementia,^4,5 ac effeithio ar blant sydd heb eu geni.^6,7

Pe bai pobl yn y DU yn llosgi coed dim ond pan nad oes ffynhonnell wres arall ar gael, gallai osgoi mwy na 1,500 o farwolaethau yn y DU bob blwyddyn ac arbed dros £54 miliwn i'r GIG mewn costau gofal iechyd.⁸

Y dystiolaeth: niweidio'r blaned

Nid yw coed yn danwydd carbon niwtral. Ar gyfer yr un faint o wres neu ynni, mae llosgi coed yn rhyddhau mwy o garbon deuocsid (CO2) nag olew neu nwy.⁹ Mae'n gallu cymryd degawdau i goed aildyfu ac adamsugno'r carbon sy'n cael ei allyrru trwy losgi coed.^10,11,12 Mae torri coed ar gyfer tanwydd yn dinistrio coedwigoedd, yn niweidio ecosystemau ac yn arwain at golli bioamrywiaeth.¹³

Y dystiolaeth: niwed i'ch waled

Mae llosgwyr coed bron bob amser yn ffordd ddrutach o wresogi’ch cartref na phympiau gwres neu foeleri nwy (oni bai eich bod chi'n casglu eich coed eich hun am ddim).¹⁴ Mae coed sgrap nad yw wedi'i sychu'n iawn neu sydd â haenau fel farnais neu baent yn gallu bod yn hynod wenwynig pan maen nhw’n cael eu llosgi.